Xustificación da actividade:

Contar unha historia. Escoitar unha historia. Velaquí dúas maneiras de gozar a través da palabra. A narración oral é sempre un acto no que se mesturan pracer e xenerosidade. Porque, para que xorda a emoción, quen conta debe poñer a súa arte e sabedoría ao servizo do auditorio, e quen escoita deberá entregarse sen reservas. Se así sucede, todos, todas, narradores e oíntes, acadarán igual sentimento de gozo mentres a narración discorre. E cal é a natureza profunda dese pracer? Quen sabe, talvez resida na intuición de que se está a asistir a un momento irrepetible: por máis que a historia volva ser contada xa non será a mesma, como o río aquel. En realidade, pouco importan agora as razóns profundas. Do que se trata é de convocar a contadores e escoitadores, contadoras e escoitadoras, para convidalos, para convidalas, a ofrecérense mutua e xenerosamente na I Festa de Narración Oral de O Pino. Ofrecerse e gozar.

O concello de O Pino, sé da Festa, é un dos mellores marcos posibles para esta celebración anual da palabra. Recentemente inaugurada, a Casa da Cultura municipal resulta un lugar idóneo para albergar boa parte das actividades que conforman o programa. Doutra banda, O Pino é un enclave de extraordinaria importancia dentro do Camiño de Santiago, e a relación entre estas dúas tradicións, Camiño e narración oral, é algo máis que evidente. Ademais, como outros concellos en expansión, O Pino precisa de eventos integradores, de espazos culturais que faciliten a vertebración harmónica dunha poboación cada vez máis diversa. E este evento vai nesa dirección.

Nesta primeira edición, A Festa da Narración Oral de O Pino estará dedicada a lembrar unha das fórmulas orais máis características da nosa tradición: o sucedido ou sucedo. En palabras de Xabier P. Docampo, “o sucedido non consiste na simple narración de sucesos ou anécdotas, senón de algo que vai moito máis aló: son historias coa estrutura dun conto de tradición oral, que sempre se narra na forma de algo acaecido na realidade”. Dinos tamén o escritor e estudoso do tema que un dos ingredientes básicos, común a todos os bos sucedidos, é o misterio: “É o elemento omnipresente, o misterio como aquilo do que a súa comprensión lle está vedada ao coñecemento humano, e que sempre nos acompañará.”

As características deste tipo de relato, que, entre outras, abre a posibilidade de titular esta edición como Sucedidos no Camiño, fano especialmente apto para inaugurar esta traxectoria que nace con vocación de reinventarse todos os anos polas mesmas datas.

Obxectivos:

        1. Contribuír á xeración de espazos que faciliten gozar das narracións orais.
        2. Recuperar e recrear formas tradicionais da narración oral: O sucedido.
        3. Facilitar a reflexión teórica e práctica sobre a arte de contar historias.
        4. Ofrecer un espazo para o intercambio de relatos relacionados co Camiño
            de Santiago.
        5. Favorecer a vertebración e dinamización social e cultural do concello de O Pino.
        6. Estimular o desenvolvemento doutros eventos no concello arredor da narración
            oral.

Patrocinan e colaboran:

       Concello de O Pino
       Dirección Xeral de Turismo / SA de Xestión do Plan Xacobeo
       Consellería de Cultura e Deporte
       Deputación Provincial da Coruña
       Consellería de Educación e Ordenación Universitaria
       Asociación Galega do Xogo Popular e Tradicional
       CPI “Camiño de Santiago”
       TESEC 
       Fundación Luís Seoane